فارس وفارد في الجبل طولك
تعالي يا اما شوفيني
ماعتش ابنك اللي ربتيه
اللي كبرتيه وعلمتيه
ابنك اللي اتجوز
وفرحتي بيه
تعالي ياما
تعالي شوفيه
بعد ماخلف
عيال وعيله
وهيله بيله
وطق الشيب ف راسوا
اتحداكي ياما
تلاقيلك شعرايه سودا
لو قعتي الف ليله وليله
دا حتي سناني وقعت
وهدومي بعد ما ضاقت
وسعت
بس ياما لساني زي ماني
واد فلاتي ونسواني
مش قولتهالي زمان
ف اول زماني
اني ابن اخوالي
الله يسامحك ياما
كنت ادعيلي دعوة
غير دي الدعوة
اديني عشقت
واتنيلت واتبهدلت
تصدقي ياما
اللي حصل حصل
بعد عيالي ماكبروا
واتجوزوا
وكمان خلفوا
فاكره لما كت
منك اهرب واكوت
والكل يدور عني
وينعلوا سلسفيلي
وسلسفيل جدودي
انتي بس اللي كتي
تبقي عارفه حدودي
وتقولي
دا زي الصقر
ع البناني ينط ويحط
دوروا ف اللي اسواق ولا الموالد
وسط الغوازي هاتلاقوه
مش بيقولوا
الواد مش بن ابوه
دا عاشق الموالد
ما الخال والد
اه يامه
فاكره كام واحده دابت
وكام اشتكت
ودموعها سالت
فاكره لما قولتي
دول فجر
والقوانين سابت
ولا فيه ظابط ولا رابط
اه ياما داحنا غلابه
ابنك الصايع الضايع
اللي دوب قلوب الصبايه صبابه
وقع ولاحدش سمي عليه
ولله لو شوفتيه
لتحزني وتشمتي وتفرحي فيه
شوفت حمام البناني ع القناني
رحت بقمحي وفولي
ونصبت ياما شراكي
اتاري ياما البناني
غير البناني
والزغاليل غير الزغاليل
مالزغاليل انواع وانواع
اه ياما من دا النوع
بنيه جنيه
منوع مبلوع
الاسم عزة والشكل وزه
والوسط منجا وكامنجا ولزه ومزه
بجد ياما مزه
شقلبت حالي ومحتالي وكياني
واللي كان كان
طبيت ونزلت ع سناني
والله ياما ماناقص
الا اعلق سلاسل وامدغ لبان
نستني اهلي وعمري واللي كان
مش كتي ياما توصيني
ع الفيس والنت
والشات والبت
لا فالحه ياست
رايحه توصي
وتحزري وتتهددي وتتوصي
ع بنات ف الاصل نبات
ويمكن جماد
هما ياما بنات المنيا
بنات
دول تسعات مش ستات
تعالي شوفي الغندره
بنات سكره متغندره
الخدود مفنجله ومنوره
تضحك وتلعب وبالف راجل
مش زي بناتنا
تتخانق ولا الف راجل
اه ياما تعالي شوفيني
وشوفي عزه
دي بتلبس احمر اخضر واصفر
وبترطن عربي وغربي
قرت واتعلمت
والنبي ياما مزه
وعليها مشية وهزه
طاب وحياتك
لجبهالك ف حياتك
واهي هاتبقي بت من بناتك
عارفه عنيها
زي مين ياما
طاب هو عندنا زيها
عشان اوصف لك ولا اقولك
سابق قولتلك
دول غفر
وغجر
حرام تقولي بشر
طاب شوفتي التلفزيون
وبنات مصر
اوعي تقولي دا هجس
طاب والمصحف
ربك يحرس
دي عزه بترقص
من غير طبل
وهي دي عايزه طبل وزمر
وربنا يامي
احلي واحلي
من بت البدر
ف نص الشهر
وليلة القدر
ورب الفجر
عيونها
ولا سوسن بدر
ولا جفونها
ام تسبلها
يخرابي ياما
ولا انعام ولا احلام
ولا الهام
حتي ريهام
راح تداري خلف ستاره
ياما عيونها قادره وقداره
ياواد انت
مش كت شيبت
ولا انا كبرت وخرفت
وبقت حالتي زفت
لساك بتجري علي ابت
امتي ها تعقل
قولي يامنيل
بت مين وعرفتها فين
خلصت المنيا
وفوت الدنيا
ورايح مصر
طاب دي ام الدنيا
ماتخافيش
اللي يجي في الريش بكشيش
ابنك هو زي ماهو
طايش وشبعان طيش
يلبس بدلة او جلابيه
يقدح عمه
وحرام او طرابيش
لا يخاف من شئ
وياما ياماكتر التلاطيش
مش هي دي دعوتك
وخليفتك ومجايبك
هو انا خلفتني ولا ربيتني
مش دي ربايتك وخليفتك
اديني بقيت مخول
اتبسطي ياسط الكل
اه يا حاجه
نفسي الاقيلك حجه
وانا شمتان
وعزه عليكي طالعه وخارجه
طاب عارفه
انا خايف منك
تحلي في عينك
وتقولي ياواد
اه منك
اديني مرتك
ليله ف حضني
دي ورده وزهره
تعطر اوضتي
بعينك يا فاطمه
قوام مانسيتي
كلامك لما اسيتي
ع المصريه
وقولتي البندر
بنات مايعه
دي بودره وحمره
وفي ساعه تبقي زي حلاوة المولد
طاب بزمه
عزه بزمه
بت بجد
وهمه ولمه
دي حمامه ويمامه
اه ياما
لما بتتنهد او تتسهد
كروان بيغرد
طاب شمي نفسها
وشوفي كلامها
عيني في عينك
بعد ما كلت عرفت احلي
وجبت البت
بت البت الاصلي
ولا خبت واتغلبت
قولي
انت تتغلب
اه منك انت
اللي جاب عزه
طاب وحياتك
يحرر غزه
فارس
وفارد ف الجبل طولك
وع قولتي وع قولك
مانت بن خوالك
واللي سبق كل النبق
يابختك بحظك وخالك
ما تخافيش
وحياتك دوختها
ودوبتها
دي سلمت ورفعت النمر
وصرخت ونادت ولا خجلت وقالت
هو دا راجلي
هالضم رجله ف رجلي
ايوه بحبه
واعشق قلبه
اصله دا فارسي
وعرف يخطفني
طاب مانا عارفاك مقوي
ونارك تشوي
هو انا نسيت بنت خالك
ولا جيرانك
والمسكينه ام عيالك
طول عمرك
بنات الدنيا
في عنيك دايبه
طاب ع ايه يا حصري
سواد لونك
وبياض شعرك
اه م عينك
يا مسهوك
واه يالسانك
هما شراكك
وهما حصان
بس اقولك
علشان عزة
تسلم ايدك
ويسلم زوقك
طول عمرك
قلب امك
وابن اخوالك
تعا ياواد اضمك
راجل
من ضهر راجل
وابن ابوك وامك
واعقد عزة ف كمك
هما تسع تشهر
وتجيبلي عزه
وراها جوز
مز ومزه
بعيون خضر
وخدود حمر
وضفاير زي الليل
زي الكحل
زي امهم
انت هاجيب من عندك
مانقره عندها
والزرع عندك
والميه عليك
يتربي في عزها
ويدوم عزك
لعزة وولاد عزك
والنبي لاضمها والضمك
والنبي ياما
انتي عاجبك عطرها
وكلامها وحسها
اه من عينها
اه من غمزها
كل دا فيها
وباين فيها
بس يا حيلتي
دا منك
انت علمتها
ودوبتها
وجاي تقول اه منها
ياواد اه منك
والنبي انا امك
وبحبك
ياريتني يا ضايع
كنت اجوزلك
.....................
أبو عمرو أبو العلا
الدوحة 6/8/2010
ليست هناك تعليقات:
إرسال تعليق